كلمات حائرة

سكتنا كتير وقلنا لاوقته ولا مكانه
لللوم ولا العتاب
ماجاش وقت الحساب

ونسيب المقاومة
وكفاية اللى هى فيه
ومش هنيجى عليها احنا كمان
نبقى احنا والزمان
دا الله يكون فى عونها

سمعنا واستحملنا

بيقولوا مصر بايعة
للقضيه الفلسطينية

بيقولوا مصر خاينة

ومبارك دا كافر
مبارك دا عميل

معلش بقا اسمحولنا

لحد هنا ولينا وقفة

اذا كانت مصر خاينة
ياريت بس تقولولنا
مين اللى اشترى
بالغالى بالنفيس
ورحوا اسألوه
وهيشهد التاريخ

دوروا فى مين غيرها
ضحا بدم وأرواح ولاده

من سنة تمانية واربعين
وجيل من بعد جيل

شهدائنا بلا حصر
دامفيش بيت فى مصر

الا تلاقيه يقولك
دا انا راح منى شهيد

***

طب وعلى افتراض
كلامكم دا صحيح

طب على اى اساس
قولولى ياناس

جاتنا من تانى حماس

وقالت تقعد تفكر
تدور على حل

اذا كانت مصر خاينة

ليه قبلت تدخلها
ليه مادورتش على غيرها
تكون احسن منها
للمسئوليةبديل
و يكون للقضية الفلسطينية
شريك جديد

***

ومن هنا هأبدا بشوية اسئلة
بجد بالنسبة ليا محيرة

هى مصر من الاول لو تفتكرو
اللى فرطت واحدة واحدة
وباعت شبر شبر
لعدو محتل
وقبضت مهرها

مصر اللى قالت لحماس
حكمى مصلحتك
وافرضى سيطرتك لوحدك
وطلعى الامن الفلسطينى
والمراقبة الدولية
وادى لاسرئيل الفرصة
علشان تقفله بالقوة
اديها بأيديكى الفرصة علشان
تفرض ظلمها

طب قوقولى وبكل صراحة
عشان مش راضية ان السلطة
الشرعية تقف جنبها
تفرض حصار شهور طوال
وماتاخدهاش الرحمة هى كمان
بغزة وشعبها
كل ده عشان تستأثر بالحكم
لوحدها

مصر اللى قالتلها حتى فى الحج
قوليلهم لأ ماترحوش
عشان ماخدتوش منى تصريح الخروج
وحرمتهم وماخلتهم يأدوا
المناسك فى وقتها

ومصر كمان اللى قالتلها
اوقفى التهدئة
ارمى ولادك
فى التهلكة
وادخلى فى حرب
دلوقتى انتى مش ادها

واضربى صواريخ
لاتشفع ولا تغنى
موتى اسرائيلى
ولا اتنين
وقدامهم
مئات استشهدوا من عندنا

يااااه اد كده هما اغلى مننا

ومن قبلها فى اجتماعتك
وبدل مايكون قسمك وولائك
للقدس وفلسطين
قولى فيه سمعا وطاعة
يامهدى يا عاكف

واما عدوك يهدد
انه هيموت قادتك
يفضلو قاعديين
ويموتو فى بيوتهم

وان كان دا يجوز
لمواطن عادى
وممكن يفكر ويقول
انا مغلوب على امرى
وانا كده هاستشهد
دا ماينفعش ولا يجوذ
لقيادى مسئول
او لولاة الامر

مش فاهميين
وياريت حد يقولنا
كات ايه الحكمة من كده

***
مصر وعدتها تساعدها
وفى حربها تقف جنبها
و خذلتها وفى اول محطة
نزلت وسابتها لوحدها
وغسلت كمان ايديها
من دمها

***
والناس الغريبة اللى سمعناها
بتحرض شعب مصر
وقوات الامن
وتقولها قومى بثورة وانقسامات
فاكراها باينها وعايزاها زيها
تدخل فى حروب اهلية
تدخل دوامة
وماتخرجش منها

طب ماتساعدها هى
وتمدلها ايدها
حتى هى اولى
لا ماضية اتفاقية
ولا معاهدة
ولسه ليه ارض محتلة
فا لو ضربتها
دا عادى جدا
ومن حقها

ولحسن حظى قبل مااكتب كلامى ده
عرفت انها بتخلى ذمتها
من كام صاروخ
اتضربو على اسرائيل
خافت ليفتكرو
انهم من عندها

دا عشان اسير
واحد من اسرائيل
دخل حرب
واهلك لبنان وشعبها

***

عارفة انه مش وقته ولا ده مكانه
بس معلشى دى بلادى
ومواقف وتاريخ بلادى

وهارضى ضميرى وادافع عنها

وانا شايفة انه ده وده
بيطعنها فى شرفها
وبيحملها المسئولية
فى كل اللى بيحصل
لوحدها
واعتبروها مع اسرائيل عدوهم

و بيقولوا شهد كمان على الاتفاق
مابينهم
شاهد من اهلها

شفتوه بعينكو وفين الدليل
وهنستفيد ايه
ده بيأكد والتانى بيدين
وده بيقول دا بوش اتصل يشكره
طب سجلتو المكالمة
سمعتوه ازاى
وكانت المكالمة عربى بقى
ولا انجليزى

واذا كانت استخبارتكم
بالدقة ديا
طب فى الحاجات المهمة
ماتورونا شغلها

والله دا حرام
نطعن فى بعض
نطعن فى شعب
دا شرف وعرض
انتو بس نسيتو
حاجة مهمة
ان الحقيقة الكاملة
لا يعلمها الا ربها

وعارفة والله
انى هالاقى رد
نازلى بالباراشوط

وجايز حد يكون قالها
من قبل حتى مايكمل
ويقرا

او حد الوقتى

قرر يكتبها

اكيد هتقولو
دى اكيد
للحكومة موالية

ولكن انا اهو بقول
انا هاعيش واموت
ودايما وعلى طول الخط
معارضة

كل الحكاية
انا بس بحاول
وانا وياكم
افكر بالعقل